Billettar
Normal pris: kr. 250. Medlemspris: kr. 150.
Korleis bli medlem? Sjekk Föreningen Smôgas Vänner lenger nede på sida.
Det er billettsal ved inngangen. Men — på grunn av gledeleg stor pågang,
kan det kan vera lurt å sikra seg billett på førehand.
Prosedyren er då denne:
Skriv ein epost til kjellhabbestad@me.com
for å få stadfesta at det finst ledige plasser.
Overfør så det aktuelle beløpet til
Vipps nr. 114607— eller
Swish nr. +47 926 31 350
Program
Maleri: Bendik Riis. Foto: Nasjonalmuseet
Ballade, sundag 30 juni kl 18
Som innleiing av årets festival vert det ei urframføring av Kjell Habbestads verk «‘I lofte’ søve’ mi jomfru’, tre mellomalderballadar for sju barneborn». Balladene er «Beiarblakken», «Liti Kjersti og Bergekongen» samt «Bendik og Årolilja». Dessutan vert somme tema frå «Mostrasuiten» framført.
Habbestad juniorensemble: Simon (fiolin), Elias (bratsj), Hanna (cello), Frida (harmonium), Mattis, Laura og Ingrid (perkusjon) og Kjell (piano). Alle sju barneborn syng dessutan, i dei tre mellomalderballadane.
Foto: Niklas Berglund, Jørn Pedersen og Trond Kjelsås
Draumkvedet, måndag 1 juli kl 18
Den norske kvedaren Kim Rysstad er attende i Smôga! Denne gongen med det norske nasjonaleposet, Draumkvedet, til tonefylgje av Ingvild Habbestad på to nyckelharpar (alt og tenor) og Ingeborg Christophersen på blokkfløyter og harmonium (‘tramporgel’). Det er Ingvild som har komponert den musikalske omgjevnaden til kvedet.
Kim Rysstad — kveding, Ingeborg Christophersen — blokkfløyter og harmonium, Ingvild Habbestad — nyckelharpar, Habbestad juniorensemble
Foto: Sveinung Bjelland og Nancy Bundt
Lieder & romansar, tysdag 2 juli kl 18
Mari Eriksmoen er ein lyrisk operasopran i verdensklasse. Det store gjennombrotet kom då ho på kort varsel overtok rolla som Zerbinetta i Strauss’ Ariadne auf Naxos i Wien.
Etter det har ho sunge i Wien ei rekkje gonger, og hatt store rollar ved dei fleste store europeiske operahus, inklusiv Teatro alla Scala. Ho har òg sunge ved Den Norske Opera & Ballett, og med ei rekkje av dei beste europeiske orkester. Med seg har ho den eminente pianisten og akkompagnatøren, Lina Braaten.
Mari Eriksmoen — sopran, Lina Braaten — piano
Foto: Morten Krogvold
Smöga Blues, onsdag 3 juli kl 18
Knut Reiersrud er bluesgitarist og komponist, m.a. kjend frå NRKs ‘Bluesasylet’, med ei rekkje musikksjangrar og mange plateutgjevingar. Han har vunne tre Spellemannsprisar, og vore nominert 11 gonger. Han har hatt samarbeid med internasjonale artistar som Buddy Guy og Otis Rush, ei rekkje norske artistar, og medverka på albumet ‘Lullabies From The Axis Of Evil.’ Han har òg arrangert mengder av norsk folkemusikk. Eit særleg kjenneteikn for Reiersrud er at han spelar el-gitar uten plekter.
Knut Reiersrud — gitarar
Foto: Fredrik Arff
Nordic Voices, torsdag 4 juli kl 18
Nordic Voices er ein norsk vokalsekstett. Repertoaret spenner frå gregoriansk song til samtidsmusikk. I tillegg til konsertar i Norge, har koret turnert og opptredd i ei rekkje europeiske land, samt, USA, Taiwan, Japan, Sør-Afrika. Nordic Voices fikk Fartein Valen-prisen i 2008 og Gammleng-prisen i 2010 i klassen kunstmusikk og har gjeve ut ei rekkje plater med musikk frå 1500-tallet til The Bee Madrigals (2017) (Bjørn Bolstad Skjelbred) der temaet er biedøden. Dei har også Kjell Habbestads Jakob Sande-kantate «Eolsharpa» på repertoaret.
Tone E. Braaten — sopran, Ingrid Hanken — sopran, Ebba Rydh — mezzosopran, Per Kristian Amundrød — tenor, Frank Havrøy —baryton, Rolf Magne Asser — bass
Foto: Antonio Armentano
Rumi Songs, fredag 5 juli kl 18
Trygve Seim (sopran- og tenorsaksofon) er ei av dei mest særprega ‘stemmene’ i europeisk jazz, med ein inntakande vakker klang i instrumenta sine. Uttrykket er inspirert av sufi-musikk og lyriske jazztradisjonar, i ein svært personlig blanding. Trygve har en stor produksjon bak seg, med epokegjerande innspelingar.
«Rumi Songs» er ein syklus komponert av musikaren og komponisten Trygve Seim. Verket baserer seg på tekstar av den persiske poeten Jalal al-Din Rumi (1207–1273) i Coleman Barks sine attdiktingar.
Seim utvikla Rumi Songs over fleire år, og har mange inspirasjonskjelder utover Rumi sine vakre dikt. Songsyklusen ber preg av Seim si sjangeroverskridande og eklektiske tilnærming til musikk, med inspirasjon og musikalske element frå både europeisk og amerikansk musikk, såvel som den orientalske musikken — som Seim gjennom mange reiser til den arabiske verda har fordjupa seg i. Han har òg opphalde seg i den tyrkiske byen Konya, der Rumi budde i mesteparten av livet sitt.
Trygve Seim — saksofonar, med fleire (TBA)
Foto: Frank Kvinge
Svartskog spelemannslag, laurdag 6 juli kl 18
Svartskog spelemannslag har vore aktivt sidan 2015, med stadig dyktigare mannskap i alderen 7-60 år. Laget er leia av Maja S. K. Ratkje og Frode Haltli, begge profilerte artistar/komponistar av internasjonalt format, men òg med sans for folkeleg musikk i lokalmiljøet. Sidan laget rekrutterer sju medlemer i storfamilien Habbestad er dei sjølvskrivne gjester, i år som i tidlegare år; og har dermed allereide ein markant utanlandsprofil.
Tora Ferner Lange, fløyte/piccolo, Mariken Hongslo Alnæs, klarinett, Astrid Løvåsen Alnæs, Elias Habbestad Kjelsås, Frida Helene Haltli, Ingeborg Alnæs Løvåsen, Ingrid Kalstad-Sjødalstrand, Ingvild Habbestad, Maja Solveig Kjelstrup Ratkje, Marte Ingeborg Haltli, Simon Habbestad Kjelsås og Trond Kjelsås, fiolin, Hanna Habbestad Kjelsås, cello, Frode Haltli og Halvor Alnæs Løvåsen, trekkspel, Sigmund Løvåsen, bass, m.fl.
